اذاعة جديدة تنضم لعالم راديو الانترنت اسمها ( تيت راديو ) www.teetradio.com , اذاعة شبابية من صنع شباب متحمس اصرر على انه يعبر عن رايه وان يكون لصوتهم مكان بين الناس.
ابطال تيت راديو هما ( ابراهيم وعلاء وديرينى وهوارى وكمان فؤاد وحربية ) , كل واحد فيهم قدر يثقف نفسه بنفسه ومعظمهم ليهم مكان فى مجال الاذاعة وكمان الصحافة يعنى عندهم خبرة فى شغلهم عشان كدة قرار انهم يعملوا اذاعة خاصة بيهم مكنتش حاجة صعبة .
انا اتعرفت عليهم وقابلتهم وعرفت منهم معلومات مهمة واتكلموا فى مواضيع اهم بس انا احب انى اسيبكم تتعرفوا على شباب تيت راديو بنفسكم ..
انا عارف ان بداية ( تيت راديو ) كانت فى بداية 2008 ... احكولى ازاى الفكرة جاتلكم ؟
الفكرة جت من اننا اساسا مدونين على الانترنت ونعتبر من الجيل الاول للمدونات وحصل اتصال بينا وبين بعض عن طريق المدونات والفيس بوك وكان تجمعنا الاول اننا نفكر فى حاجة جديدة تكون تحديث لفكرة المدونات وفكرة التعبير على الانترنت وكل ده كان فى اواخر شهر 11 اللى فات وعلى طول من غير اى ترتيبات قررنا اننا نعمل محطة على الانترنت وبداءنا ندور على شقة وازاى هنعمل استوديو والاجهزة والتكاليف .
يعنى تعبتوا عشان تيت راديو توصل للناس ؟
التعب جه من ناحية تجهيز المكان ويكون مناسب وان يكون عندنا استوديو والشقة دى جايبنها مخصوص لاذاعتنا وتعبتنا جامد عشان تكون شقة اصلا .
مين اللى اختار اسم ( تيت راديو ) ؟
احمد الديرينى هوا اللى اختار الاسم واتفقنا عليه كلنا
وليه شعاركم ( تيت راديو بوابة المكتئبين والمحبطين ) ؟
ده مش الشعار الوحيد لان شعارنا الرسمى هو ان تيت راديو ( صوت الجالية المصرية فى مصر )
الشعار ده بردو غريب شوية
لا هوا مش غريب واحنا حاسين بالاغتراب فى بلدنا وحاسين كمان اد ايه فى شباب محبط فى مصر .
مواضيع معينة بتحبوا تتكلموا فيها ولا انتوا بتتكلموا فى اى حاجة ؟
احنا عاملين حوالى 90 ايتم اتكلمنا عن اى موضوع تتخيله يعنى اتكلمنا فى الرياضة والفن والجنس والسياسة والدين وموضوعات مختلفة اكتر وكنا مغطيين كاس الامم الافريقية من غانا وكان عندنا مراسلين هناك وعملنا الحوار الوحيد مع ابو تريكه وقت موضوع تى شريت تعاطفا مع غزة .
ايه اكتر موضوع حسيتوا انه شد ناس كتير ؟
اكتر موضوع جاب تعليقات لحد دلوقتى هوا موضوع ( اكل العيش والشغل ) واتكلمنا عن مشاكل فرص العمل والاكل اللى بنحصل عليه وازاى الامراض انتشرت فى اكلنا واكتر تعليق يهمنا جدا هوا واحد قال ( انا عايز اشتغل اى حاجة ) كفاية اوى انه دخل على النت وسمعنا وكان رد فعله انه قال عايز اشتغل اى حاجة .
مين اللى بيحضر المواضيع ؟
احنا معندناش مين بيحضر مواضيع ومين مابيحضرش لاننا بنقعد مع بعض زى اجتماع وكل واحد بيقول رايه او موضوع ومافيش اى مانع اننا نتكلم فى اى موضوع واحنا عاما بنتكلم بكل حرية وبنتكلم بكلام الناس لاننا بنكلم الناس عشان احنا من الناس دول .
طيب عايز اعرف مواضيعكم موجهة للشباب بس ولا كل الفئات ؟
احنا بنخاطب كل من لديه قدرة على السمع يعنى مش مقتصرين على فئة واحدة وكلامنا ومواضيعنا لكل الناس كبار او شباب .
سمعتوا قبل كدة حد وجهلكم نقد شديد لاذاعتكم ؟
ايوة قابلنا قبل كدة نقد جامد من احد الصحفيين وطلب من السلطات انها تحقق معانا كدة من غير تهمة ومجرد ان حد حكاله عننا قال رايه فينا واتكلم عن ايتم احنا مكتبنهوش ومسجلناهوش ومحدش سمعه قبل كدة اصلا وقدرنا نرد على الكلام ده فى ايتم عندنا .
ليه مافيش اصوات نسائية فى تيت راديو ؟
هما فين ... ؟ احنا بيجيلنا يوميا اكتر من 20 ايميل من ناس عايزة تكون معانا وبنرد موافقيين بس يبعتلنا نموذج بفكرة واحدة لكن محدش بيرد باى حاجة وده لانهم فاكرين اننا عندنا معدين متخصصين لكن احنا الحقيقة اللى بنكتب واحنا اللى بنحضر واحنا كمان اللى بنذيع .
معنى كدة ان مافيش مانع ينضم ليكوا اى حد جديد بدون شروط ؟
لا الشرط الوحيد ان اللى عايز يكون معانا يبعتلنا فكرة او موضوع وده شرطنا الوحيد لان مش لازم اللى هتذيع او اللى هيذيع يكون صوتهم حلو يعنى مجرد انهم بيعرفوا يتكلموا عادى مع اى حد وعندهم افكار يبقى اهلا وسهلا بيهم ومعندناش اى شرط تانى .
ناويين تكملوا اذاعتكم على النت ولا هتحاولوا يكون ليها مكان فى
الراديو العادى؟
وليه نرجع لورا بالعكس احنا كدة مسابقين الراديو والنت مستقبله اقوى وقريب الراديو هيختفى مع التقدم السريع والنت هوا اللى هيكون متاح وده شىء طبيعى وعن طريق النت التواصل بيكون اسرع واكتر وبنقدر نعرف كام واحد بيسمعنا وبيسمع ايه وامتى وده بيقربنا اكتر من المستمع لانه يعتبر اهم حد عندنا عكس طبعا الراديو محدش يقدر يعرف مين بسمعه وايه المواضيع اللى عجبت الناس وردود الافعال والتعليقات وكل ده مش متوافر على الراديو العادى عشان كدة احنا مش زعلانين اننا مش فى الراديو ومقتنعين تماما ان اذاعتنا على النت اهم من وجودها فى الراديو ..
اشمعنى انا
22 مايو, 2008 08:49 صباحاً
ليه يا دنيا بتسرقينى وعن حبايبى تبعدينى
ليه تملي بتجرحينى وبالوهم دايما توعدينى
اشمعنى انا الظلمانى , اشمعنى انا مش حد تانى
زمان كنت فى حالى عايش وسط اصحابى
لا عمرى شاكيت ايامى ولا عمرى طلبت الغالى
عايش راضى بحالى لو حتى الجرح سقانى
دنا مش طالب اوهام تسكن معايا فاحلام
وانا كل طلبى اعيش وسط اصحابى اعيش
دول هما اغلى احبابى
انا وقلمى
20 مايو, 2008 07:16 صباحاً
اصبحنا صديقين لا نفترق واتفقنا , اتفقنا ان نعيش سويا ونتعايش فى كل الظروف , نتفاعل فى شعور واحد واحساسنا لديه حس واحد بيننا.
قلمى هو صديقى الدائم الذى لا يفارقنى وانا لا افارقه , حجمه ضئيل لكنه قدير بالنسبة لى و قد يستهزء به من ينظر اليه ويقول هذا قلم جماد لا يحس لا يشعر لا يتكلم ولكنى ارى غير ذلك واشعر بالغيرة عليه والغيرة من الحب والحب من الصداقة الحق والحق اننا نكمل بعضنا البعض ونتفق فى الرأى كثيرا , ونذهب الى الشارع سويا فهو لا يفارق جيبى بالرغم من كرهه لهذا المكان فعندما انظر الى شىء يستفز مشاعرى ويحرك عقلى نحو الكتابة الاحظ صديقى وقتها وهو فى حالة سرعة فى دقات قلبه وثوران الحماسة لديه ويحايلنى ان يخرج من جيبيى ويستند الى ورقة تشبع حاجته ويملىء فيها كبته.قلمى هو الاداة فى التعبير عن وصف ما بداخلى برقى وتحضر وهو مدير شؤون الكتابة فعندما يشاهدنى اجهز ورقى وحالى استعدادا للكتابة اشاهدة فرحا وسعيدا بى ويكاد ان يعانقنى من الفرحة فانه لا يعرف عمل سوى الكتابة وليس لديه حرفة او مهنة سوى نقل ما بداخلى الى الورقة وانا اذكر عندما اكتب اغنية رومانسة احس به وكانه يعزف على لحن الكلمات ويدق قلبه بكل حرف يرسمه من عقلى ويضيف الكلمة على الكلمة حتى يستمتع بالمعنى واشاهده وهو يبكى عندما تكون الاغنية حزينة ولكن دموعه تحمسنى وتزيد اصرارى على الكتابة لانه لا ينافقنى اذا كانت الاغنية تلمس قلبه صدقا وكذلك عندما ابدا فى فى كتابة مقال ويكون مهتما ويناقشنى فيما اكتبه وقد نتفق وقد نعترض ولكننا دائما متفقون ان اختلاف الرأى لا يفسد للود قضية فعندما اشاهده توقف تماما عن الكتابة اعرف وقتها ان الجملة لاتعجبه واراجعها وقد الاحظ بها شىء من النفاق اغضبه فهو حقا لا يحب الا الحق وقد تكون الجملة فارغة فى معناها وينصحنى بحذفها واقوم بتغيرها الى الافضل , فهذا هو قلمى , هذا هو صديقى الدائم
اليسا صوت يستسلم له احساسك –
15 مايو, 2008 11:13 صباحاً
اليسا غنت ونجحت ابدعت حتى تفوقت, اليسا مطربة متحيزة لكل جديد وجميل , مطربة تملك اشياء كثيرة وتملك ادوات يفتقدها كثير من المطربات , تستمع الى صوتها وتحس انك تنجذب اليها من اول كلمة فى الاغنية وتصمت عن الكلام وتنتظر نهاية الكوبليه الاول وتفكر ماذا ستقول فى الكوبليه التالى ويبدء احساسك فى الاستسلام لصوتها وتغوص مشاعرك فى كلمات اغانيها وتقرر ان تعيش فى عالم اخر تعيش فيه على اوتار صوتها الذى يملىء كل فراغ ويسلب كل ملل ويطفىء شمعة الوحدة .
عمرها الفنى لا يتعدى الست سنوات والغريب انها اصبحت المطربة الاولى فى الوطن العربى وبطلة معظم الحفلات الكبيرة ومثال دائما للجمال والاناقة الحقيقة, تملك اليسا جوائز كثيرة فى عمرها الفنى القليل واهم هذة الجوائز ( الورلد ميوزك اوردس ) التى حازت عليها مرتان وكانت المرة الاولى عندما حققت اعلى مبيعات عن البوم ( احلى دنيا ) والثانية على التوالى عن البوم ( بستناك ) فحقا انها ناجحة ومبدعة وهذا رأى الكثير من الناس الذين قدروا واستمعوا اليها جيدا واحبوا تميزها الفنى الغنى عن الكلام والوصف لانه واضح فى كل اعمالها واخرها فى البومها الاخير ( ايامى بيك ) .
البوم ( ايامى بيك ) وهو احدث البومات اليسا وكالعادة من انجح الالبومات التى صدرت فى الفترة الاخيرة وهذا الالبوم ملىء بالكلمات الجديدة التى حملت معانى جميلة وتميل بشدة نحو الحب والواقعية وايضا الالحان التى جذبت كل من سمع الاغانى وكذلك التوزيع البسيط الذى حمل لقب السهل الممتنع ويبدو وكانه صوت نابع من الكلمات والالحان الغاية فى الرقى والاحساس .
اذا نظرا الى الالبوم من داخله من حيث الاغانى سنرى ان الالبوم لم ينقصه شىء وفيه تنوع منظم وجمال فى الاداء مثل اغنية ( ايامى بيك ) التى تعبر عن عن جمال معنى الحب مثل هذة الجملة ( حبيت ايامى بيك وبعيشها ليك ولا عمرى حبيت من قبليك ) وايضا فى اغنية ( على حبك ) عندما قالت ( على حبك فتحت عيونى مش همى الناس يشوفونى ) وتاتى اليسا الى عالم الواقع باغنية ( اديك عرفت ) وتقول (من كتر حبى فيك خلاص انا قربت اكرهك عشان مش مش عارفة اكتر من اللى عملته امل ايه مش بس عينى وروحى كل ما فيا بيندهك ) وتملىء اليسا الشتاء دفئا فى اغنية ( اواخر الشتا ) وتبدع فى هذة الاغنية التى تقول ( كنا فى اواخر الشتا قبل اللى فات زى اليومين دول عشان معا بعض حكايات انا كنت لما احب اتونس معاه انا كنت باخد بعضى واروحلو من سكات ) , استغربت اليسا كثيرا على حال حبيبها فى اغنية ( انا بستغرب عليه) عندما قالت ( انا بستغرب عليه لا يكون فى حد قللو او شوقى يكون واصلو لو فاتنى العمر كلو حايرجع حبى يلاقيه ) ..
اثبتت اليسا فى هذا اللبوم انها نجحت فى الحفاظ على النجاح السابق ومازالت متميزة ومجتهدة دائما فحقا انها مطربة جيدة تستمع اليها فى حبك وجرحك , فى غرامك والامك , تستمع اليها فى كل الاوقات لانها اليسا ..
اوروبيون بطيعتنا شرقيون ..
15 مايو, 2008 11:10 صباحاً
الحياة هى رحلات وكل رحلة لها هدفها ولابد ان تصل للهدف حتى تكون
الرحلة بالمسمى والفعل كما ان الرحلة الحقيقية هى التى تفيد وتضيف لنا , الرحلة هذه المرة معنوية نستعد ونسافر لها بعقلنا واحلامنا .
اننا ننظر كثيرا للفيلم الغربى على انه خيال لا نراه الا فى السينما ولكنه غالبا مايكون واقعا يعيشه اخرون فى عالم اخر ليس بمثالى لانه يحتوى العيوب كما انه يملك التقدم والتفوق كما نرى دائما فى هذه الافلام الاحترام المتبادل بين الافراد وحسن التصرف فى بعض المواقف واكثر شىء يكون بارزا هو المحافظة على مصلحة الغير ومصلحة الدولة واملاكها والنظافة التى تعتبر من الاشياء الاساسية هناك فى كل مكان وهذا بالطبع نقيض لما يحدث فى عالمنا, افكارهم دائما سابقة للواقع ولكنهم لا يعيشون طويلا فى احلامهم وذلك لقدرتهم على على التحقيق اكثر من قدرتهم على التأجيل والانتظار فالحضارة الاوروبية متنوعة وشاملة كل المجالات وهذا بالطبع يذكرنا بحالنا قبل اكثر من ألف سنة مضت, اقامنا حضارة ووضعنا قواعد العلم والثقافة وصنعنا علماء بأفكار فريدة اعتمدت عليها باقى الحضارات ولكن الماضى اصبح الان امل الحاضر , فالغرب اخذوا منا تقدمنا فى الماضى وطرقوا لنا تخلفهم البعيد كواقع نعيش به حاضرنا فأصبحنا فى الخلف والاخرون هم الذين يقودون من علموهم بناء الحضارات , واستسلمنا لكل ذلك بل وساعدناهم عندما بعدنا عن هدف الحياة وهو ان نضيف ونعمل لنتقدم ونتفوق .
الشىء الوحيد الذى تبقى من ماضينا هو التراث والتقاليد , هذا هو الشى الذى نملكه من تقدم كنا نعيشه ومبادئنا الشرقية النادرة فهذه اشياء لابد ان نستمر فى الحفاظ عليها حتى لا نفقد هويتنا .
ماذا يحدث اذا حلمنا ان نكون مثل هذا العالم الغربى و ايضا ان نبدأ فى تحقيق الحلم ولكننا لا نبالى ولا نفكر بتقدمهم المخيف السؤيع ونظل على حالنا وكلما تقدمو نزيد نحن تأخرا ولكن فى رأى ان جيلنا ( جيل الشباب الان ) هو الجيل الاكثر قابلية فى بدء هذه المهمة نظرا لافكارنا المليئة بالسرعة ولاننا نواكب التكنولوجيا فى يومها ونذهب وراء التعرف على كل ما هو جديد , الشباب العربى بصفة عامة يشبه كثيرا الشباب الغربى فى كل شىء ولكننا ينقصنا الطموح كى نعيش الحياة بكل مافيها فأننى اعتقد اذا اتيح لجيلنا بعض الصلاحيات والحرية فى المشاركة والتعبير عن افكار تبدو غريبة عن عالمنا ولكنها شديدة الواقعية وحتى اذا ما اتيحت هذه الشروط فكل منا لديه عقل يتصرف به وشخصية يستطيع ان يجدد افكارها واتجاهاتها للمزيد من الافضل والمجتمع ما هو الا افراد اذا تقدم كل فرد ونمى من شخصية فتلقائيا يتقدم المجتمع كله ويتحرك من مرحلة الى اخرى فنحن نريد ان نكون اوروبيون بطيعتنا شرقيون ..
احنا جيل عايش بمزاجو
12 مايو, 2008 09:28 مساءاً
بصراحة احنا عايزين نعيشها ونقضيها قبل ما نكبر وتروح علينا , عايزين نعيش بمزاجنا وبالطريقة اللى تعجبنا ( غلط او صح ) مش مهم , المهم نظبط ايامنا .
جيلنا جيل فاهم كل حاجة وليه فى كل حاجة , محدش يعرف يضحك علينا ولا نصاب مبتدء يقدر ينصب علينا , عارفين بنعمل ايه وعارفين نظامنا ايه , نخرج فى الوقت اللى على مزاجنا ونروح الحته اللى تعجبنا ولو سيتى ستارز يبقة قشطة يلا على هناك لكن لو جراند حياه يبقى احسن نشوف فى جبنا كام , طب شلة ولا قابلز بنات ولا ولاد , كافيه ولا سينما ونتمشى وناخد كانزات.
الجامعة حايتنا وممكن تكون خانقتنا , مش مهم المحاضرة الاولى بس التانية لازم دنا ورايا معاد معا بنت اموره اهو يومين كدة واصاحب صاحبتها وتظبطنى معاها..
عايزة اصاحب ولد يكون انتيمى واحكيلو ويحكيلى كفاية بقة صحوبية بنات بلا خنقة , مش عرفة مودى مالو النهارده يمكن عشان مخدتش النسكافيه بتاعى طب اكلم العيال ونتفق على خروجة جامدة قبل الساعة 5 عشان الحق اروح وبابا مايقوليش بقة كنتى فين ومش عارفة ايه ويبقى حوار مالوش لازمة..
ايه يا معلم مالك, مش عارف يا مان من ساعت ما شوفتها وانا عايز اكلمها , طب اروح اكلمهالك؟ واشوفلك نظامها ايه؟ , قشطة عليك يا مان .. يامعلم يامعلم ده البنت واقعة على الاخر دى ما صدقت واديتنى موبيلها وقالتلى اوك خليه يكلمنى باليل واى خدمة يا معلم..
بجد احنا جيل مالوش حل ومعندوش مشاكل لانه حلال للمشاكل ودايما طريقنا واحد وطريقة حياتنا واحدة وقرارتنا اسرع من تفكيرنا وبيس يا مان ...
فاضلنا دولة ونطلع برة ...
12 مايو, 2008 08:59 مساءاً
يعنى ايه وطن عربى؟؟ , على فكرة كلمة ملهاش معنى ومش انا اللى بقول كدة لانك لو فتحت كتاب التاريخ فى الثانوية العامة او حتى الاعدادية هتلاقى وطن عربى (يعنى) 23 دولة عربية تحت راية واحدة , شمل وتعاون واحد ومصالح وقوة واحدة ادام اى عدو خارجى , بس ده المعنى اللى نعرفوا لكن لو عايز تعرف المعنى الواقعى والصح يبقى ما عليك انك تدور فى اى كتاب او مرجع صادر عن ماما امريكا او ايا من اخواتها وكفاية ان مجلة وزارة الدفاع الامريكة بتخصص صفحات للوطن العربى الجديد , وساعتها هتعرف ان الوطن العربى رمز للخلافات الداخلية والتمزق سواء الثقافى او سياسى او حتى اجتماعى وملاهى للدول المسّتعمِرة وطبعا هو ده المعنى الصح والواقع فعلا .
احنا العرب دايما صوتنا عالى وراسنا دايما فى الارض ونعمل فيها سياسيين مخدرمين ادام بعض فقط , ده غير اننا محترفين فى اننا نعمل معاهدات واتفاقيات بينا وبين بعض بس كلها وهم وعمرنا ما شوفنا حاجة بتتنفذ بفاعلية بجد ونفضل نقول ونعيد وتزيد خلافتنا من اول وجديد ! .
كل يوم بننسرق ( اه بننسرق وساكتين كمان ) بدؤها بفلسطين لما سرقوها عينى عينك وقدموها هدية لعصابة مسمين نفسهم اسرائيل واخرها العراق (قصدى ) اللى كان العراق بعد خريطة التقسيم الجديدة اللى هتخلى العراق 3 دول فى دولة واحدة ( ال ايه كونفدرالية) , والمزاد بدأ واللى هيدفع اكتر حلال عليه تانى اكبر مخزون بترول فى العالم .
امريكا دخلت العراق باجندة ومش هتخرج منها قبل تنفيذها وده علشان فكرة دخول العراق قديمة جدا من ايام
الامريكى جيمى كارتر ومن ساعتها وهما بيجهزوا ويرتبوا اوراقهم لدخول الوطن العربى عن طريق صدام حسين او العراق وطبعا التنفيذ مكنش صعب ابدا , لما تيجى دولة عربية (اخر حرف فى اسمها ر) بالسماح لاقامة قواعد امريكة على ارضها لضرب (شقيقتها) العراق وتسمح دولة تانية ( علمها فى موجود فيه رمز طائر قوى ) لامريكا فى اختراق المجال الجوى لتسهيل عملية ضرب (شقيقتها) العراق !! , وده غير الخبايا والاسرار اللى لسة فى الملفات السرية بس اللى يستفزك حقيقى لما تلاقى العرب بعد كدة بيستنكروا دخول امريكا للعراق واحتجاجات وكلام فاضى وصوت عالى ميهزش عسكرى واحد فى الجيش الامريكى اللى بقالوا اكتر من 5 سنين فى ارض عربية ( وليه بيعمل ايه فى ارض عربية وهو مش عربى؟ ) لانه محتل ولص لحق مش حقه .
صدقنى متستغربش لو صحيت بكرة على خبر دخول امريكا للعاصمة السورية ورفع العلم الامريكى هناك وطبعا انت عارف الباقى !!, وسنتين كدة ونشوف الامريكان فى كل الاراضى العربية وده مش صعب على امريكا اللى ممكن تضمر العالم كله اكتر من 13 مرة ..
فلسطين,كويت,عراق وخليج عربى , خلاص فاضلنا دولة ونطلع برة والله اعلم برة فين وامتى الدور علينا ولامتى السكوت والجبن هيفضل عامينا ولامتى هنفضل نعانى من مرضنا المزمن ( الاختلاف دائما) ..
يا ترى هنشوف عمرو دياب تانى ؟
22 مايو, 2008 08:48 صباحاً
البداية كانت يوم الاربع ( 11 \10\ 1961 ) واليوم ده اتولد فيه انسان بجد هو حالة نادرة جدا , واحد اسمو عمرو عبد الباسط عبد العزيز دياب كان طفل عادى عايش فى بورسعيد و والده راجل عادى كان بيشتغل فى قناة السويس والوالده ست طيبة بترعى بيتها يعنى كانت اسرة عادية جدا وعدت ايام وسنين وسنة 1979 فى قصر الثقافة فى بورسعيد هنالك غنى عمرو عبد الباسط والناس حبو صوتو اوى وبقة من حد اساسى فى الفرقة وكان بيغنى لعبد الحليم وعبد الوهاب وام كلثوم ودول طبعا ناس جامدة اوى مش اى حد يغيلهم ولازم يكون عندو موهبة حقيقية وقدر عمرو يثبط نفسة ويثبت جمال صوته بشكل غير عادى واتشهر فى منطقته فى بورسعيد واقترح عليه الملحن الكبير هانى شنودة انو يجى القاهرة عشان الناس كلها تسمعوا وتعرفوا وفعلا الفكرة عجبت عمرو جدا ونجح فى امتحان الاذاعة وعمل اغنية للراديو بس للاسف منجحتش ولكنه مقلش لا انا مافيش منى فايدة وهرجع تانى بورسعيد , وراح غنى فى كازينوهات شارع الهرم لمدة مش قليلة ومرت الايام وبدء عمرو فى اول البوم فى طريقه وهوا البوم (ياطريق) والابوم كان فيه 8 اغانى متنوعة بين الطرب والحزن والرومانسية وعلى الرغم من كدة الالبوم منجحش بالقدر المطلوب.
عمرو محس ابدا باليأس وعشان كدة كمل وعمل الالبوم التانى والتالت نجح وبدء و واصل الطريق ودخل مجال السينما بدور بسيط فى فيلم السجينتان وغنى فيه اغنية الشهيرة ( هلا هلا ) وقام بالبطولة فى فيلم العفاريت وانتشر بالبومه ميال وشوقنا ونجح نجاح كبير واصبح له جمهور عريض وقدم بعد كدة فيلمه الشبابى ( ايس كريم فى جليم ) الفيلم الذى احسن تقديمه ونجح ونجح اوى بالفيلم ده فى السينما وكمان فى الالبوم وفى السنة اللى بعديها على طول قدم فيلم ضحك ولعب وجد وحب اللى شارك فيه معا يسرا وعمر الشريف وكان فيلم شبابى وجرىء.
السر فى نجاح عمرو بسرعة معا الناس انو أتأكد ان الاختلاف عن الاخرون وانو يكون عمرو دياب وبس ده الشىء اللى اعتمد عليه فى مشواره الطويل واثبت ده لما فاز بالورلد ميوزك اوردس سنة 1998 عن البوم نور العين الى حقق اعلى مبيعات فى تاريخ العرب وكان رائد فى ده لانه المطرب العربى الاول اللى يفوز بيها وده لانو عمرو دياب واكد بكدة ان الاختلاف هو سر النجاح على الاخرون , زاد عمرو دياب شهرة خارج الوطن العربى وعمل العديد من الحفلات واولها امريكا.
الغريب ان عمرو دياب مطرب متواضع لا يحب الكلام الكثير ولكن الاشاعات كان وراه فى كل وقت واغربهه اشاعة انو قال ( ان جيله تفوق على جيل حليم وام كلثوم ) وقامت الدنيا عليه ولكنه مهتزش وعرف ازاى يوضح كلامه ومن هنا عرفت الناس ان عمرو ديابذكى جدا وصاحب مبادىء وافكار خاصة به.
دايما عمرو يحاول ان يكون لفنه مكان اساسى فى العالم كله وعشان كدة قصد فى البوم قمرين انو يمعل الغانى معا ناس ليها شهرة برة مصر وفى العالم زى اغنية (بحبك اكتر ) مع Angela Demetrious واغنية ( قلبى ) مع الشاب خالد فنان الراى الكبير ونجح الالبوم نجاح كبير ..
ميوزك اوردس كلاكيت تانى مرة وكانت سنة 2002 عن البومه الشهير ( اكتر واحد ) واثبت عمرو ان المطرب الحقيقى هو الذى ينجح بعد نجاح ويستمر فى الصعود يوما بعد يوم ولا نهاية من الاجتهاد الفنان يجب ان يستمر حتى اخر نفس ولا عمر للفن عاما , اصبح عمرو الاول دائما وبفارق كبير عن باقى المطربين كمان انه اصبح القائد لجيله وجيل من بعده واكد ده فى البومه الاخير ( اليلادى ) عندما انتصر بفنة وتعبه على كل الاقاويل والتوقعات واعلن انه اذكى من كل ذلك ان 25 سنة فى الوسط الفنى كفيلة بصد كل هذه الهجمات وعلاوة على ذلك الموزك اوردس الثالثة على اعلى مبيعات فى الشرق الاوسط ..
عمرو الان فى سن السابعة والاربعين لكن لو شاهدتة على الاستيدج تشعر انه فى سن السابعة والعشرين , ومن المعروف ان عمرو له تلاميذ تربوا على اغانيه وتعلمو من كلامه وقلدوه فى لبسه وحبو استاذهم الاول عمرو دياب ومنهم محمد حماقى وحسام حبيب وتامر حسنى ورامى صبرى لكن الغريب ان بعدهم ينكر هذا الجميل ويقودوا الحروب امام استاذهم عمرو دياب الذى استمر على القمى طوال الخمسة عشر عام الاخيرة ولكن السؤال ( يا ترى هنشوف حد زى عمرو دياب تانى ) مطرب من شارع الهرم الى الميوزك اوردس وعالمية والسعة , انا فى رأى ان لتكرار هذا المطرب مرة اخرى لابد من مواصفات ومطالب شديدة الصعوبة هذه الايام واعتقد ان الايام لن تصنع عمرو دياب اخر ...
من طرف 
